Vefdagbók - Vorönn 2003

2003-05-29T22:40:00.000Z

Góða kvöldið.

Ég var að taka gríðarlega til á svæðinu mínu, eyða öllu út og skipuleggja þetta betur - sá reyndar bara rétt í þessu að linkurinn á heimasíðuna hér til vinstri var vitlaus...búið að eyða þeirri síðu út. Nú á þetta allt að virka sæmilega.

Ekki laust við að maður hafi verið með hjartað í buxunum....alltaf smá hræðsla við að maður sé að gleyma einhverjum tengingum.

Snilldarverkfæri í Dreamweaver..þetta Reports....í Site glugganum. Leitar að öllum mögulegum og ómögulegum villum á síðunni...maður fær sér bara kaffi á meðan :-)

Kveðja,
Balli

2003-05-29T03:33:00.000Z

Jæja, þá er ég loksins að verða búinn með þetta allt saman....á þó slatta eftir, en glasið er hálffullt (ekki í bókstaflegri merkingu..he..heemm).

Ég setti tónlistarvefinn hérna, en á eftir að skoða hann í einni eða tveim öðrum tölvum til að fullvissa mig um að ég hafi hvergi tengt inn á harða drifið og svoleiðis leiðindi.
Þá breytti ég aðeins heimasíðunni hjá mér. Aðallega til að æfa mig í Fireworks forritinu. Myndin af mér er ótrúlega svöl...eða hitt þó! Reyndi að taka þúsund myndir, en endaði alltaf eins og misheppnaður stráklingur að reyna vera karlmannlegur :-)
Ég er sérlega ánægður með að hafa náð að gera ,,interactívt" vefpíanó á tónlistarvefinn - eftir gríðarlega leit að slíkri græju á netinu gafst ég upp og gerði sjálfur.
Þetta tók hátt í 20 tímana, enda óvanur Flash-vinnslu - svo þurfti maður að redda sér forritum til að klippa wavefælana sem ég spilaði inn af hljómborðinu. Klippti þá reyndar heldur knappt, en hef ekki þrek í að laga það þar til eftir mánaðarmót.

Nú þegar þetta fer að verða búið læðist auðvitað samviskubitið að vegna krakkanna. Mikið rosalega hef ég vanrækt þau upp á síðkastið - allur tími farið í þetta verkefni. Jæja...ég er svo þreyttur núna að ég gæti farið að skrifa eitthvað væmið. Best að hætta.

Kveðja,
Balli

2003-05-24T14:18:00.000Z

Góðan daginn.

Ég vildi bara láta vita aðeins af mér. Er að sjálfsögðu í tímahraki með þetta, vinn í vefsíðunum í öllum frístundum og meira til.

Ég gæti þurft að hreinsa út allar síður sem ég með núna - tímabundið - til að koma tónmenntavefnum upp og prófa hann. Hann er kominn vel yfir 10 Mb svo ég þurfti að versla nýtt vefsvæði fyrir hann. Er nú að bíða eftir að það verði virkjað svo ég geti flutt skrár beint úr Dreamweaver. Þetta átti að vera tilbúið en Vodafone er í einhverjum smá vandræðum með þetta.

Allavega - vefirnir mínir gætu legið eitthvað niðri næstu daga en verða (vonandi) komnir upp fyrir síðasta skiladag.

Kveðja,
Balli

2003-05-17T00:06:00.000Z

Góða kvöldið.

Ég er búinn að vinna í verkefnum í allt kvöld - eftir að börnin fengust í háttinn. Ég er alveg að tapa mér í þessu - fullmikil vinna miðað við einingafjölda, en þetta er gaman og það er það sem skiptir máli....ekki satt?

Nú ætla ég að leggjast fyrir framan sjónvarpið og horfa á eins og einn þátt af "Cold Feet" - sá þann fyrsta á ævinni í gær og líkaði bara nokkuð vel. Ætti auðvitað að fara sofa....en maður hugsar bara þannig þegar maður vaknar á morgnanna....."í kvöld SKAL ég fara snemma að sofa....ég lofa...heheeemmm".

Bestu kveðjur, vona að allt gangi vel hjá ykkur öllum,
Balli

2003-05-12T22:33:00.000Z

Ég þakka upplýsingarnar varðandi WebBoard-ið. Er að byrja aftur á þessu öllu núna, þurfti að fara suður í nokkra daga.

Hafði reiknað með að geta unnið sleitulaust í þessu allan sólahringinn næstu 5 daga (er í fríi), en konan varð að fara í sína heimabyggð í nokkra daga og mun því mestur tíminn fara í ungana - ekki að maður sjái eftir því :-)
Annars er þetta vonandi allt í góðu, tímahrakið sér til þess að maður vinni í þessu allar þær stundir sem gefast.

Kveðja,
Balli.

2003-05-07T22:21:00.000Z

Góða kvöldið. Nú er fjör, allt komið á fullt og verkefnin sem ég er að vinna í skemmtileg - svona á þetta að vera!

Eitt sem mig vantar eftir tölvuhrunið - veffangið á Webboard síðunni....getur einhver bjargað mér með það?

Bestu kveðjur,
Balli

2003-05-01T21:38:00.000Z

Jæja...nú er allt komið á fullt hjá mér. Sjálfsvorkunin búinn og nóg að gera. Er að vinna í þessu öllu.....í einu...sem er kannski ekkert gríðarlega gáfulegt. Skipulagið fer að komast á hreint. Er mikið að velta þessum tónlistarvef fyrir mér - sennilega geri ég eins og Inga stakk upp á og hef hann tónmenntamiðaðann.

Bestu kveðjur,
Balli

2003-04-27T14:41:00.000Z

Góðan daginn.

Mátti ekki fara í vinnu í dag. Hringt í mig úr vinnunni og mér skipað að vera heima einn dag í viðbót....ekki búinn að fara úr húsi í 5 - 6 daga og er orðinn andlegur jafnoki túnfisks í dós.
Búinn að setja forritin inn í tölvuna....en hef ekki kraft í mér til að byrja að tengja þetta allt aftur og endurskipuleggja. Finnst samt pínulítið gott að vera með tölvuóþol á lokastigi...því ég veit að í kjölfar slíks verður til gríðarlegur sköpunarkraftur....svona þegar ég hef mig uppúr þessu. Ætla bara að góna á teiknimyndir með Köru Mist í smá stund og sjá hvort að krafturinn verði kominn í kvöld. Kannski fæ ég mér popp líka...ef ég nenni að kveikja á örbylgjuofninum....christ hvað sjálfsvorkun getur verið skemmtileg.....ég nærist á þessu........ég nenni ekki einu sinni að fylgjast með pólitíkinni þessa dagana, svo upptekinn er ég af eigin vansæld..harharhar. Er jafnvel að spá í að dreifa teiknibólum á hina ólíklegustu staði...svo ég geti óvart stigið á þær og vorkennt mér aðeins meira :-)

Jæja, nóg um það. Vona að allir hafi það gott. Nú fer ég að hella mér í slaginn...mjög fljótlega, enda tíminn alltaf að styttast fram að skilum.

Kveðja,
Balli

2003-04-26T22:00:00.000Z

Sæl Inga - ákvað að svara þér hér þar sem litlu kassarnir leyfa ekki nema takmarkaðan stafafjölda.
Nú er það ekki svo að ég sé snillingur í vörnum gegn hökkurum....harharhar..augljóslega.....en eftir þessar hörmungar náði ég mér í mikilvægt tæki - eldvegg - til að setja upp í tölvunni. Ég get að miklu leyti kennt sjálfum mér um, ég vissi af hættunum en var einhvernveginn viss um að þetta kæmi aldrei fyrir mig.

Eldveggurinn ZoneAlarm er til í ókeypis útgáfu (maður þarf svolítið að hafa fyrir því að finna hana á vefnum þeirra. Slíkt forrit er algjört möst...svo slett sé fagurlega. Svo verður eldveggurinn auðvitað traustari eftir því sem þú borgar meira fyrir hann - sem ég get ekki núna því ég þarf að borga svo mikið í símreikning :-)

Annað er að hafa gott password á administrator réttindum, þ.e. að það sé ekki auðvelt að brjóta það upp.

Gott vírusvarnarforrit til að koma í veg fyrir að einhverju sé smyglað inn í tölvuna hjá þér, sem veitir öðrum aðgengi að henni.

Svo er eitt varðandi þetta sem kom fyrir hjá mér - ef ég hefði verið heima hefði ég hugsanlega tekið eftir þessu því ég skoða þetta mjög reglulega.
Ef allt er eðlilegt - þá er "sent" talan í ADSL-inu alltaf mun lægri tala en "received" talan (sést með því að halda bendlinum yfir ADSL íkoninu í taskbarnum). Í mínu tilfelli hefur einhver íslendingur náð að komast inn hjá mér, náð í helling af drasli frá útlöndum og sent það til sín og þannig sloppið við að borga erlenda flutninginn - innanlandsumferð er ókeypis - en ég sit í súpunni. Sent og Received hafa þá verið á svipuðu reki....Sent allavega komið óeðlilega hátt.

(Á þessu geta auðvitað verið undantekningar, t.d. ef vélin sem þú vinnur á er meira notuð í að senda gögn og upplýsingar en að afla þeirra.....þá er ekkert óeðlilegt við að sent sé jafnhátt eða hærra en received.)

Allavega - ég hef gert allt sem ég get og ætla ekki að láta þetta koma fyrir hjá mér aftur. Ég er með gggrrríííðððaarrrlleeggaaa langt password á administratorréttindum....og svona til öryggis þá er inn í passwordinu miðju "hackershavesmalldicks" svona rétt til að ég nái þó einu höggi áður en þeir sigra mig aftur....hehehehe.

Kveðja,
Balli

2003-04-26T16:09:00.000Z

Tveir dagar liðnir og enn sé ég ekki skeytið sem ég setti inn fyrir 2 dögum - nema þegar ég ætla að setja þetta hérna skeyti inn. Maður á einfaldlega að vera með bloggerinn á sínu svæði, þá gengur þetta mun hraðar og betur fyrir sig.
Er að vinna rólega í þessum verkefnum - þarf samt að ná aftur í allar síðurnar vegna stælanna í tölvunni.

Kveðja,
Balli

2003-04-24T14:47:00.000Z

Góðan daginn. Þá er maður kominn aftur. Tíminn frá staðbundnu lotunni hefur verið einn sá ömurlegast sem ég hef upplifað lengi (aumingja ég!). Þegar ég kom heim....uppgötvaði ég að einhver djö...hakkara ræfill hafði brotist inn í tölvuna hjá mér og notað ADSL-ið til að ná sér í gögn. Ég sé fram á 25 - 30.000 símreikning um mánaðarmótin. Tölvan var auk þess mjög dularfull og virkaði illa - um þrem dögum síðar "krassaði" hún algerlega. Ég hófst handa við að setja þetta upp allt saman, sem gekk reyndar ekki þrautalaust - krakkarnir höfðu komist í mikilvægasta diskinn minn, með öllum driverum og skemmt hann. Buhuhuhuuuuu.
Þegar ég var alveg að verða búinn að sneiða fram hjá öllum vandamálum lagðist ég síðan í eina þá hrikalegustu flensu sem ég hef fengið lengi og er þegar þetta er skrifað, en að stíga upp úr henni - hitinn er kominn niður í 38, og virðist á hraðri leið niður. Til að bæta gráu ofan á svart hafði maður öll helstu einkenni lungnabólgunnar sem nú geisar í heiminum - hár hiti, þurr hósti og allur sá pakki.
Allvega...nú horfir allt til betri vegar, ég er að hressast og mamma skutlaði til mín bollasúpum áðan (týpískur karlmaður - þarf mikla þjónustu frá mömmu þegar ég verð veikur...hehehehe).
Nú er ég að fara búa til notendur fyrir mig og konuna - koma póstforritinu upp og setja inn þessi forrit sem ég þarf að nota í náminu. Meira geri ég ekki í dag - verð að fá smá meiri tíma til að vorkenna mér yfir illsku heimsins :-) Ég reyni svo að skrifa hér á hverjum degi næstu daga til að ná upp meðaltalinu sem datt verulega niður í þessu veseni öllu.

Kveðja,
Balli

2003-04-06T23:26:00.000Z

Merkilegt að fylgjast með þessu árásarstríði USA/UK á Írak. Á hverjum degi kemur álappalegur herforingi og flytur lofsyrði um "precision bombing" hermanna bandamanna - allt er svo hárnákvæmt hjá þeim, fullkomið og mistök er aldrei minnst á.
Þess á milli berast svo reglulega fréttir af því hvernig hinar ofurnákvæmu sprengjur hafa murkað lífið úr saklausum borgurum, auk þess sem maður virðist aldrei geta verið alveg viss um hver er að berjast við hvern - svo duglegir eru USA menn við að gera árásir á eigin mannskap eða hermenn breta.

Svo á maður að trúa því að þessar sprengjur geti allt og hitti alltaf það sem þær eiga að hitta.
Þess utan finnst mér merkileg þessi nýja tækni Bush - að segja Guð fylgja sínum her á vígvellinum. Það virðist helst sem hann vilji endanlega vilja gulltryggja almenna reiði og hatur arabaríkja í garð USA.....gulltryggja að þeir skelli sér í eins og eitt gott jihad.

Gaman að því að sannleikurinn komi loks í ljós varðandi framlög til menntamála - Tómas Ingi hefur lengi haldið "fremst í heimi" ræður um menntakerfið - nú er sem sagt komið í ljós að við leggjum minnst fé til menntamála af norðulöndunum. Hvað hefði gerst ef Þorvaldur hefði ekki skrifað greinina sem ég bendi á hér að neðan? Ætli hagstofa hefði upplýst um mistökin?
Þá er skemmtilegt í því ljósi að velta fyrir sér hversvegna Ríkissjónvarpinu finnst það stórfrétt þegar Tómas Ingi segir að við leggjum einna mest í heimi til menntamála - en sömu fréttastofu finnst það ekki fréttnæmt að allt var þetta á misskilningi byggt. Svona geta þeir beitt UT fyrir sig....þ.e. með því að ákveða hvaða upplýsingar berast okkur.

Jæja, afsakið pólitíkina - námið gengur bara allt ágætlega og ég veit ekki hvernig í ósköpunum ég á að geta skrifað hér þrisvar í viku ef maður má ekki tjá sig um áhugamálin líka.

Kveðja,
Balli

2003-04-02T21:06:00.000Z

Er að vinna í skattaskýrslunni. Þvílíkt vesen - alltaf skal ég bíða fram á síðustu stundu.

Námið gengur hægt en örugglega, allt að verða tilbúið fyrir staðbundnu lotuna.

Verð að skjóta hér að tengli á grein Þorvaldar Gylfasonar hagfræðings varðandi OECD og menntamál. Mikið get ég orðið þreyttur á þessu "Ísland er best" kjaftæði í háttvirtum menntamálaráðherra.

Kveðja,
Balli

2003-03-23T00:23:00.000Z

Úppss...ég var alveg búinn að gleyma þessari dagbók. Hef svo sem lítið að segja, búinn að vinna verkefni utan við skilin til Sólveigar. Er svona að reyna að komast í þetta af fullnægjandi krafti.

Vona að allt gangi vel hjá ykkur.

Kveðja,
Balli

2003-03-16T01:59:00.000Z

Jæja þá er ég búinn með vefsíðuna sem um var beðið. Íslenska og enska. Tengillinn er hér til hliðar (Skil - Lára). Vona að þetta virki allt saman vel.

Kveðja,
Balli.

2003-03-13T21:11:00.000Z

UT - 2003
Fyrirlestrar / greinargerð

NETLIST KENNARA - Ármann Halldórsson

Í bráðskemmtilegum fyrirlestri ræddi Ármann fram og aftur um þá þróun sem átt hefur sér stað í notkun netsins sem listforms. Hann ræddi um hvernig listamenn væru farnir að nota vefinn í rauntíma, t.d. með verkum sem eiga aðsetur sitt á netinu og eru í sífelldri þróun. Þetta má t.d. sjá á vefsíðum Páls Thayer og Ragnars Helga Ólafssonar. Þarna eru á ferðinni, að mínu mati, stórskemmtileg verk í stöðugri þróun. Vefurinn býður upp á fullkomið abstrakt - notendur hafa áhrif á hvað gerist í verkunum, en engin veit hvernig. T.d. taldi Ármann að Páll vissi ekki sjálfur hvernig kóðinn í mynd/hljóðverki sínu virkaði og því algerlega ómögulegt að spá fyrir um útkomuna. (Sjá vísan í síðu hjá Páli - erfitt getur reynst að loka því aftur)
Þá fjallaði Ármann um ritverkið "Lovestar" eftir Andra Snæ, en þar fléttast netið rækilega inn í söguna. Fleiri verk / listamenn var farið lauslega yfir, m.a. myndina Matrix sem fjallar um heim þar sem fólk býr í hólfum og er beintengt við alheimsnet. Á því neti fer líf fólks fram og á það sér í raun enga tilveru utan þess.
Þá var litið á fyrirbæri á borð við "all your base are belong to us". Þetta er setning sem birtist í innsetningu á gömlum tölvuleik fyrir mörgum árum síðan. Hún lá í dvala í langan tíma, en skýtur svo upp kollinum sem tískufyrirbæri, svo afkárlegt að það er orðið að list (er ég kominn á hættulegar brautir?). Ef setningin er sleginn svona inn (með rangri málfræði og allt) t.d. í Google leitarvélina - fær maður tæplega 40.000 svaranir.
Ég á í raun frekar erfitt með að finna einhverja galla á þessum fyrirlestri - Ármann var mjög öruggur og hreif mann með sér í umræðuefninu. Helst að tækniatriði væru til trafala, t.d. virtust fyrirlesarar ekki geta farið á netið án þess að lenda í einhverjum auglýsingasíðum frá UT2003 fyrst og veit ég til þess að það virkaði truflandi. Þá hefði tíminn gjarnan mátt vera aðeins lengri. Kostir við þennan fyrirlestur voru ekki endilega í formi lærdóms - a.m.k. ekki eitthvað sem maður getur bent á og sagt "þetta lærði ég". Þetta var mun fremur n.k. hugvekja, ef svo mætti að orði komast. Um möguleika netsins sem listmiðlis og í raun lífstíls

Margmiðlun í kennslu nemenda með sérþarfir - Sigurður Fjalar Jónsson
Hér var litið yfir gagnlega hluti varðandi sérkennslu. Sérstaklega var farið vel í forrit að nafni "Clicker 4", en það virtist einstaklega sniðugt forrit sem býður kennurum upp á að breyta, bæta og sníða virknina algerlega eftir eigin höfði. Forritið virkar bæði með texta og myndir og hægt að blanda saman til að fá það sem maður leitar eftir.
Þá tók Sigurður fyrir nokkur forrit sem hægt er að finna á netinu og sýndi fram á hvernig ókeypis t.d. leikjaforrit sem hægt er að ná í á auðveldan hátt, geta nýst sem sérkennslutæki á einfaldan hátt.
Eins og hann benti á sjálfur, að leikur sem hann húðskammar suma nemendur fyrir að stelast í, getur verið gullnáma fyrir annan nemanda.
Fyrirlesturinn var að flestu leyti góður - hann kom með margar hugmyndir sem hægt er að nota. Einföldun á því sem til er, virðist vera vannýttur kostur þegar kemur að sérkennslu með tölvur. Við þurfum ekki alltaf að kaupa eitthvað sérhannað - stundum virkar það best sem ætlað var til annars. Ef einhvern galla mætti finna - er það helst sá tími sem fór í Clicker forritið. Hann hefði að ósekju mátt vera minni, en þó er það kannski vafamál. Sennilega hefur Sigurður verið fengin vegna þess að skóli hans hefur unnið mikið starf við að þróa þetta inn í kennslu hjá sér. A.m.k. sagðist hann ekki vera á prósentum :-)

Ekki ætla ég að hafa þetta lengra - virðist kominn vel yfir mörk þeirrar lengdar sem gefin var upp, afsakaðu það.

Kveðja, Balli.

2003-03-09T22:50:00.000Z

Jæja, þá eru komin fyrirmæli frá Láru varðandi úrvinnslu á gögnum úr staðbundinni lotu. Nú getur maður farið að bretta upp ermarnar og vinna í þessu. Það er varla að maður hafi mátt vera að því að setja hérna inn upp á síðkastið - slík er harkan í kosningarbaráttunni að maður hefur varla tíma á milli fréttatíma í neitt annað en að rífast við vini og vandamenn um þjóðmálin.
Nú er ágætt að fara hvíla sig svolítið á því og vinna í þeim verkefnum sem Lára birtir á vefsíðu sinni.

Hafið það gott og gangi ykkur vel með verkefnin.

Kveðja,
Balli

2003-03-02T23:53:00.000Z

Þá er ég búinn að laga íslensku stafina, eftir ábendinguna frá Hildi fór ég á síðuna hennar Elísabetu (er þetta ekki rétt fallbeygt?) og setti svo inn kóðann fyrir stafina. Hafið þið þökk fyrir þetta :-)

Svo sé ég að ég hef misst út eldri pistla þrátt fyrir að hafa látið allt fikt vera í þeirri deild. Ég á reyndar afrit af þeim flestum svo þetta er nú ekkert stórmál. Nenni samt ekki að stressa mig yfir þessu strax, enda búinn að setja tæknilýsinguna inn á verkefnasíðuna mína.

Nú ætla ég að setja nokkrar myndir inn á heimasíðuna mína og fara svo að sofa. Góða nótt.

Kveðja,
Balli.

2003-02-28T03:30:00.000Z

Búinn að gera útlitið á síðunum eins og ég vil hafa það....þessa vikuna :-)

Ég er einn af þessum sem vilja hafa eitthvað samræmi í síðunum. Ákvað því að taka nokkrar myndir af lyklaborðinu mínu og hafa á verkefnasíðu og heimasíðu. Svo.....svona rétt til að sýna að ég sé ekki hættulega sérvitur - tók ég mynd af ryksugunni minni til að hafa á þessari síðu.
Ætla aðeins að fikta í templatinu núna og fara svo að sofa - svo ég meðtaki nú eitthvað á morgun.

Afhverju er annars bloggerinn að mótmæla íslenskum stöfum í linkunum hjá mér núna? Ég hef þetta bara án þeirra - vona að það sé afsakað þar til ég nenni að komast til botns í þessu.

Kveðja,
Balli

2003-02-27T02:18:00.000Z

Mættur aftur. Hef ekki margt að segja. Er að leggja lokahönd á þetta allt saman og reyni að koma því sem ég er búinn með inn á morgun eða hinn. Ég hef verið að spá í því frá því ég skrifaði síðast...af hverju er maður svona ragur við að skrifa hérna inn. Þ.e., ef engin verkefni liggja fyrir sem maður á að setja inn - þá setur maður bara ekkert inn! Ég held það sé - a.m.k. hvað mig varðar - sú árátta að halda að allt eigi að vera merkilegt sem hér fari inn og að lágmarksorðafjöldi eigi að vera svona 5-6 hundruð orð....hehehe.

Það er auðvitað (vona ég) misskilningur. Ég held að aðalþjálfunin í bloggi sé sú að venja sig af fullkomnunaráráttunni og leyfa þessu að streyma svolítið fram. Erfitt en kannski mögulegt.

Mig hlakkar til að fara á UT ráðstefnuna - hef ekki farið á svoleiðis áður. Er þó pínu neikvæður fyrirfram, það er bara hluti af mínum lífsstíl. Vona að þetta verði ekki tveggja daga lofgjörð um upplýsingatækni á Íslandi. Sennilega verður það þó ekki - nokkuð margt þarna sem virðist áhugavert og fræðandi. Sé ykkur á Akureyri.

Kveðja,
Balli

2003-02-20T21:04:00.000Z

Jæja. Þá er maður mættur aftur. Ég er búinn að vera alltof latur undanfarið við að setja inn hugleiðingar á bloggernum.
Nú verður tekið á því!
Ég breytti útliti síðunnar um daginn og hef ekkert gert eftir það. Annars er einkennilegt hvað ég fæ umsvifalaust leið á og pirrast yfir "look-inu" á þessari síðu og heimasíðunni - tveir, þrír dagar og þá fer ég að spá í hvað þetta sé nú hallærislegt hjá mér :-)

Annars er það kannski ágætt - um að gera að prófa sig áfram og komast að einhverri niðurstöðu sem ég get sætt mig við. Verst er þó þegar útlitspælingar eru farnar að skipa veigameiri sess en hugleiðingar um efnið sem á að vera í boði.

Ég hef komið mér upp þeirri reglu að rita pistla mína hér inn á Notepad og "kópíera" þá síðan yfir...ef þeir eru langir.

Annars er frábært þegar maður vinnur með Template-inn í bloggernum, að koma kóðanum yfir í Dreamweaver og vinna með hann þar. Þá litast segðirnar í réttum litum og allt verður miklu auðskiljanlegra.
Svo finnst mér verulegur munur á hvernig vafrarnir tveir, IE og Netscape virka með bloggernum. Netscape kemur inn með allar breytingar um leið - bara ýta einu sinni á "Refresh" og allar breytingar birtast - Internet Explorerinn virkar alls ekki svona vel....a.m.k. ekki hjá mér.

Jæja..þá er best að koma sér aftur að verki í útfærslu á Vefrallý - er eitthvað að reyna koma þessu betur saman hjá mér, fínstilla og prófa.

Kveðja, Balli.

2003-02-13T23:12:00.000Z

Arg. Setti inn langan pistil rétt áðan - svo fór allt til and....þegar ég póstaði honum. Bloggerinn getur stundum verið dálítið pirrandi. Maður verður greinilega að venja sig á að velja allt og "kópíera" áður en maður sendir! Guði sé lof fyrir flýtilykla.

Varðandi langa pistilinn...ég ætla EKKI að prenta hann aftur inn. Nú missti bloggerinn af feitum bita!

Kveðja,
Balli

2003-02-13T23:09:00.000Z

Jæja. Hef svo sem lítið að segja.

Er að hugsa um þessar síður sem maður er búinn að vera vinna í og á að setja upp á námskeiðinu. Ég ætla að breyta aðeins uppsetningu og litum á þessari síðu - og langar til að hafa einhverja heildarmynd á mínum síðum. Þ.e. að litir eða uppsetning segi notanda að hann sé enn innan "míns" svæðis.

Ég er ekki alveg búinn að hugsa þetta, en vonandi skýrist þetta fljótlega í hausnum á mér svo ég geti komist niður á eitthvað sem ég ætla að halda í....annars er auðvitað fín æfing fólgin í að breyta reglulega og fikta. Verst þegar það kemur í bakið á manni og stórkostleg vandræði ná yfirhöndinni.

Annars er ég spenntur fyrir forritinu sem Salvör sendi okkur póst um. Mér virðist sem þetta sé eitthvað sem maður getur unnið í - í beinni - ef svo mætti að orði komast. Afskaplega sniðugt ef satt er. "Download" (he..hemm..niðurhals) tengillinn virkaði ekki áðan, en ég næ kannski í prufuútgáfu síðar.

Kveðja,
Balli

2003-02-09T00:28:00.000Z

Jæja, þá er ég búinn að henda inn teljara. Missti reyndar myndina út í leiðinni - botna ekkert í því, en ég setti hana inn aftur og allt í góðu lagi

Húðin á löngutöng er farinn af að mestu - það er hörkumál að ná þessum teljara upp í þriggja stafa tölu. Refresh - Refresh - Refresh...endalaust! Öll hjálp vel þeginn :-)

Kveðja,
Balli

2003-02-05T12:35:00.000Z

Jæja. Nú er ég hættur við að það sé í tísku að hafa svörin fyrir ofan - því ég fann út hvernig ég gat komið þeim niður.
Nú er það í tísku!!!

Svona getur maður nú mótað tískuna eftir eigin höfði :-)

Áður hafði ég í tómri vitleysu afritað kóðabút sem ekki átti að fara með og var því smá bútur í þessu þar sem kom /BlogDateHeader á undan BlogDateHeader
Sem sagt - lokun á undan opnun.

Ef einhver skildi lenda í þessu þá voru villuboðin eitthvað á þá leið að IndexString væri out of range.
Kveðja,
Balli

2003-02-05T02:21:00.000Z

Mér tókst að fá þetta backblogger dót til að virka ágætlega - en gallinn er sá að það birtist fyrir ofan skeytin og á eftir að íslenska aðeins betur - Svör virkar auðvitað ekki...þegar það er eitt skeyti komið. Set frekar skilaboð eins og Salvör.

Ég ætlaði að setja þetta neðan við skeytin áðan, en þá fór bloggerinn að haga sér undarlega - svo ég hef ákveðið að það sé ný tíska...rosalega flott...að hafa skilaboð frá lesendum fyrir ofan skeytin.

Þá geta þeir líka sett inn skilaboð án þess að lesa ruglið í mér fyrst!

Kveðja,
Balli

2003-01-31T23:36:00.000Z

Óþolandi drasl sem neitar að uppfæra sig akkúrat þegar maður er að fara að skila!
Er bara að skrifa þetta til að reyna búa til röð sem ýtir á skilaskeytið...hehehehe...maður er einfaldur :-)

Kveðja,
Balli

2003-01-31T23:13:00.000Z

Jæja. Það mátti ekki tæpara standa.
Nú er komið inn uppkast af vefrallý-inu - slatti eftir en þetta dugir eflaust í bili.
Ég ákvað sem sagt að búa til nokkurskonar fjármálarallý...þar sem nemendur eiga að fylgja ákveðnum forsendum - laun, sparifé, uppihaldskostnaði og fleira - og kaupa sér íbúð og bíl án þess að fara yfir kostnað og lenda í mínus.
Þeir nota lánareikna og slíkt til að finna út réttar tölur - tölurnar núna eru eflaust eitthvað sem þarf að laga aðeins til, en gefa þó vonandi einhverja mynd á verkefnið. Hér má sjá verkefnið eins og það lítur út í dag.

Vandamál
Aðal erfiðleikarnir við að vinna í þessu verkefni eru óöryggi varðandi hvað maður ætti að gefa nemendum mikið. Þannig nota ég í nokkrum tilfellum leitarsíður - tengla í flokkaskiptingu Leit.is. Svo er ég með lánareikni á Íslandsbanka, en gef ekki beina tengingu á hann heldur ætlast til þess að nemendur þurfi að hafa svolítið fyrir því að finna hann - er þetta röng hugsun hjá mér?

Bið að heilsa í bili,
Balli

2003-01-30T00:26:00.000Z

Þá er að koma mynd á þetta allt saman. Er auðvitað að fikta allt of mikið....sennilega. Nú er ég þó búinn að liggja yfir nokkrum hugmyndum um vefrallý og skoða hvað er til á netinu. Ætli ég komi ekki með endanlega ákvörðun um efni annað kvöld.

Varðandi þetta umhverfi (blogger) þá er ég að verða sáttur. Búinn að breyta litunum í uppáhaldið - andstöðulitina blátt og appelsínugult. Vantar þó enn að finna út hvernig maður getur breytt "template-um" sem koma upp í "archives" dálkunum.

Svo er ég búinn að koma upp verkefnasíðunni sem ég ætla samt aðeins að hvíla núna - enda á hún vonandi eftir að breytast mikið í framtíðinni. Mikið rosalega er samt gaman að fikta í Dreamweaver - Að mínu mati mörgum klössum fyrir ofan Frontpage. Ég er sérstaklega hrifinn af flipaskiptri valrönd efst í forritinu - svipað og boðið er upp á í Borland Builder forritunarumhverfinu. Einfalt og gott.

Jæja. Ég læt þetta gott heita í bili.

Kveðja,
Balli

2003-01-27T00:36:00.000Z

Jæja. Þá er maður kominn í vandræði - það er aldrei leiðinlegt :-)

Tenglarnir virðast vera eitthvað bilaðir og lagast ekkert sama hvað ég fikta í kóðanum. Búinn að eyða temp skránum úr tölvunni svo varla eru þær að flækjast fyrir. Bloggerinn virðist taka hægt við breytingum. Er þó með afrit af öllu draslinu og er því sæmilega rólegur.

Kveðja,
Balli.

2003-01-26T21:06:00.000Z

Hvaða tækni bý ég við í dag

Verkefni í ,,Nám og kennsla á netinu" 2003 - Skiladagur 1. febrúar '03.

Búnaður

Fyrst skal telja hefðubundinn búnað - borðtölvuna . Hún er í meðallagi hvað varðar kraft og áreiðanleika. Um er að ræða uppfærslu frá Tölvulistanum (1200 MHz / 256 í vinnsluminni). Ég hef ekkert spáð í hvaða tegund hún er, það virðist ekki standa á kassanum.
Stýrikerfi - WinMe / Win2000 / LinuxMandrake, eitt á hverju ,,partition-i" (man ekki íslenska orðið yfir partition - Sneið?).
Windows 2000 er mest notað dags daglega, WinMe fyrir leiki og slíkt en Linuxinn er aðallega tilraun til að sannfæra sjálfan mig um að ég fylgist vel með í tölvubransanum (er alltaf á leiðinni að læra betur á það kerfi).

Í stuttu máli er búnaður tengdur tölvum og tölvunotkun um það bil svona: Borðtölva - GSM - Skanni - Prentari - Stafræn myndavél - hljómborð. Þá dreymir mig um að eignast fartölvu þegar efni og aðstæður gefa tilefni til, sem sagt eftir mjög langan tíma :-)

Notkun

Sjálfur nota ég tölvuna til að fræðast um málefni, þrasa á spjallþráðum, forrita, fylgjast með í mínu fagi og leika mér. Þá nota ég hana að sjálfsögðu til að halda sambandi við vini og ættingja sem búa fjarri minni heimabyggð. Þannig nota ég MSN til samskipta við bróður minn (Manchester), en sú notkun hefur heldur dregist saman í kjölfar samkeppni á símamarkaði sem gerir okkur kleift að hringja til útlanda á hóflegu verði. Í vinnunni (sambýli) nota ég aðallega Excel (fyrir bókhald íbúa), Word og samskiptaforrit. Í tónlistinni og tónlistarkennslu nota ég mikið algeng tónlistarforrit, t.d. Cubase fyrir upptökur og Sibelius fyrir nótnaútskrift.

Konan notar hana til samskipta og til að halda úti heimasíðum Köru og Victors á netinu (sérstaklega mikilvægt fyrir hennar fjölskyldu sem býr á Hellissandi og sér því börnin ekki oft).

Eldri stelpan hefur fengið smá þjálfun í tölvunni og notar hana þegar hún fær leyfi til - stuttan tíma í einu. Þá finnst henni skemmtilegast að sjá sögur, læra og leika sér í stubbunum. Tölvan heitir "Stubbatölva" hjá henni.

Sjálfur tel ég að það sem mestu hefur breytt fyrir okkur undanfarið, er breytingin úr 56k módemi yfir í ADSL. Tölvan hefur öðlast víðara hlutverk í kjölfarið, t.d. sem símaskrá og samskiptatæki (fæ tilkynningar um póst um leið og fer frá sendanda). Það sem mestu breytir er þó hversu auðvelt er að nálgast og uppfæra forrit í tölvunni, eitthvað sem gat tekið margar klukkustundir með venulegu símalínunni.

Möguleikinn á að versla í matinn á netinu er varla til staðar í dag, a.m.k. ekki hér á Akureyri. Ég hef þó hringt og spurt verslunarfyrirtæki út í þetta og þeir hafa sagt að slíkt muni verða í boði fljótlega. Mér var einnig tjáð að ég gæti pantað matvöru í Hagkaup fyrir sunnan og fengið hana heim að dyrum á Akureyri, en ég yrði að vísu rukkaður um sendingarkostnað flutningabílsins norður...hehehe...eitthvað sem ég hef varla hugsað mér að gera.

Ég lít þó svo á að spara megi töluverðar upphæðir á að versla gegnum netið, a.m.k. ef sú þjónusta verður eitthvað í líkingu við það sem tíðkast í nágrannalöndunum. Ef sendingarkostnaður er hóflegur get ég fullyrt að ég spari fjármuni við að fara ekki sjálfur í búðina. Oft er dýrasti partur innkaupanna þegar maður fellur fyrir einhverju sem maður sér í versluninni, vantar ekki, en kaupir af því það er svo gríðarlega ódýrt...og miklvægt...og....!

Ég hef í raun lítið gert af því að kaupa af netinu, en þó hef ég fjárfest í nokkrum forritum sem ég hef talið nauðsynleg (t.d. BackUp forriti - alger nauðsyn í vírusþrungnum tölvuheimi). Svo hef ég eitthvað verslað bækur....meðan maður hafði enn efni á slíkum munaði :-)

Samskipti

Mér er algerlega ómögulegt að rifja upp hvenær ég fór fyrst á netið og sendi tölvupóst, en ég man eftir mér fyrir ansi mörgum árum síðan í einni af fyrstu tölvum föður míns - skoðandi skjöl sem hægt var að ná í frá útlendum háskólum. Gopher hét forritið að mig minnir og þetta þótti mér stórfengleg tækni.

Hvað GSM síma varðar man ég eftir fyrstu kynnum mínum af þeim. Ég var frekar seinn (sennilega um 1999/2000) að fá mér slíka græju, enda er mér meinilla við síma þó þetta séu vissulega þörf tæki. Ég man þó eftir því að mér fannst ansi flott að geta hringt úti, inni eða hvar sem ég var staddur. Þegar nýjabrumið var farið af var einungis eftir það sem ég sagði áðan...mér er meinilla við síma og er því oft slökkt á ,,gemmsanum" hjá mér.

Reynsla - Framtíðarsýn

Ég setti fyrst upp vefsíðu fyrir einhverjum árum síðan og hef sérlega gaman af að dunda við það. Þær breytast ört hjá mér en yfirleitt er aldrei neitt af viti á þeim. Bara léttar kynningar og eitthvað sem mér finnst spennandi þá stundina. Ég hef þó reynt að gera aðgengilegt efni sem ég tel að nýtist minni fagstétt og vona að það komi einhverjum að gagni.

Í það heila litið hefur tæknin auðvitað gjörbreytt lífi mínu, alveg frá fyrstu tölvunni sem ég fékk um 1985 (sjá mynd). Síðan þá hefur þetta auðvitað gerst hægt og sígandi og maður hefur einhvernveginn ekki nægilega yfirsýn yfir breytingarnar þegar maður lifir þær....ef þið skiljið hvað ég á við. Ég var svo sem aldrei duglegur við bréfaskriftir, en með tilkomu tölvutækninnar hefur þetta orðið mjög einfalt og þægilegt (þó horfi ég á "snail-mail" bréfin í rómantísku ljósi og finnst þau einhvernveginn persónulegri).

Ég get ekki litið svo á að tæknin hafi einfaldað líf okkar, en tel þó að hún hafi aukið möguleika okkar á ýmsum sviðum. Hugsanlega kann einhver að vera þessu ósammála, en ég tel þó að sá tími sem fer í viðhald, uppfærslu, flækjur og ýmiskonar vesen varðandi tækjabúnað sé það mikill að erfitt sé að halda því fram að um einföldun sé að ræða. Hinsvegar getum við nú lært hvar sem er, við getum lesið okkur til um mál jafnvel frá fyrstu hendi, við fréttum beint af atburðum út um allan heim og getum myndað okkur skoðun með sjálfstæðum athugunum....ekki bara mishlutlægum fréttum.

Þessi greinargerð sem hér birtist er uppkast - samkvæmt fyrirlögn kennara mun hún birtast á verkefnasíðu innan fárra vikna og mun þá birtast í endanlegri mynd.

Kveðja,
Baldur M. Rafnsson

bar@strik.is

Verkefnasíða

2003-01-24T11:02:00.000Z

Setti inn leiðréttingu á námssíðutengli. Virkar vonandi núna.

Svo ég kynni mig lítillega, þá er ég þrítugur karlmaður búsettur norður á Akureyri. Þar er ég fæddur og uppalinn, en bjó þó í Reykjavík í nokkur ár eða þar til elsta barnið mitt fæddist. Ég á tvö börn, Köru Mist (að verða þriggja ára) og Victor Huga (eins árs). Myndir af þeim getið þið séð hér að neðan - betri helmingnum (Margrét Dögg unnusta mín) er sleppt þar sem ég hef ekki sótt um leyfi fyrirfram.

Ég er þroskaþjálfi frá K.H.Í. og starfa sem deildarstjóri á sambýli hér í bænum.
Ég útskrifaðist árið 2000 og fór þá í Háskólann í Reykjavík og tók 15 einingar af tölvunarfræðibrautinni. Þá var ég að kenna í litlum skóla rétt utan Akureyrar, m.a. annars tölvu- og upplýsingafræði og fékk mikinn áhuga á þessari grein og skráði mig í K.H.Í. skömmu áður en ég hætti að kenna, eða "leiðbeinast" svo rétt sé farið með :-)

Í tónlistinni er ég aðallega menntaður á básúnu og rafbassa og er þessa stundina við afleysingar í rafbassakennslu við T.A.

Áhugamál sem myndu teljast nokkuð "föst" eru tölvur og allt sem viðkemur þeim, tónlist og pólitík. Önnur áhugamál koma og fara.

Hér eru börnin mín - Victor Hugi og Kara Mist.

Kveðja,
Baldur M. Rafnsson

2003-01-21T18:15:00.000Z

Góðan dag / gott kvöld.

Hér mun ég halda úti dagbók tengdri námi við Kennaraháskóla Íslands - námskeiðið nefnist ,,Nám og kennsla á netinu". Umsjón námskeiðs: Salvör Gissurardóttir.
Efnistök verða samkvæmt fyrirmælum frá Salvöru.
Auk þessarar síðu mun ég halda úti sérstakri námssíðu tengslum við þetta námskeið.

Þess utan býð ég gesti velkomna á mína eigin heimasíðu - gæti litið vel út á teljaranum þegar ég kem því í verk að setja hann upp :-)

Kveðja,
Baldur M. Rafnsson